Тамара Котевска потпиша договор со агенцијата за таленти United Talent Agency со седиште во Беверли Хилс, Калифорнија.
Котевска заедно со Љубомир Стефанов, го режираше документарецот „Медена земја“ (Honeyland), што беше прогласен за најдобар на филмскиот фестивал Санденс, собра уште бројни други награди ширум светот и уште ја освојува светската критика.
„Медена земја“ во Јута доби големата награда на жирито (Grand Jury Prize) за најдобар документарен филм, а на снимателите Фејми Даут и Самир Љума им беше врачена наградaта за најдобра кинематографија (Special Jury Award for Cinematography). Документарецот го доби и специјалното признание од жирито за влијание за промена (Special Jury Award for Impact for Change). Првпат во историјата на реномираната манифестација еден проект беше награден со три признанија.
Документарецот од 26 јули се прикажува во кината во САД, застапуван од американската компанија за производство и дистрибуција на филмови Neon, која ги откупи правата за прикажување во Северна Америка.
Инаку, на „Ротен томејтос“ (Rotten Tomatoes) – водечкиот онлајн агрегатор на филмски и ТВ-критки, кој важи за еден од најрелевантните ресурси за препораки на филмови, „Медена земја“ има 100 отсто позитивни коментари.
Кон крајот на август ќе биде прикажан пред домашната публика, на најголемиот фестивал за документарни филмови кај нас, „Македокс“, по што ќе се најде на редовниот репертоар во скопските кина.
Котевска е во претпродукција со нејзиниот игран филм „Man vs. Flock“. Таа ги режираше и го напиша сценариото за кратките филмови „Paw Law“, „House on a Rocky Road“, „Games“ and „Free Hugs“.