Регион

Коѕијас за протестите: Од милион стигнавме на 4.000, Грците ги кршат стереотипите

18. јуни 2018 - 9:55 | МИА

Атина, 18 јуни 2018 (МИА) - Од еден милион демонстранти, дојдовме на 100.000 и сега на 4.000. Ова покажува дека грчкиот народ ги крши стереотипите, рече Никос Коѕијас, коментирајќи ги вчерашните протести во близина на Преспа.

Како што јави дописничката на МИА од Атина, шефот на грчката дипломатија, веднаш по потпишувањето на договорот со Македонија, се сретна со префектот на областа Западна Македонија, Теодорос Карипидис, кој му предаде резолуција од регионалниот совет во која се изразува несогласувањето на граѓаните со договореното сложено име со географска одредница, ерга омнес.

Карипидис, паралелно, го извести Коѕијас за протестите и повредените, на што шефот на грчката дипломатија коментираше дека бил мал бројот на демонстрантите, заклучи дека Грците ги кршат стереотипите и праша „дали било протест или обид да се спречи потпишувањето на договорот“.

- Локалното население овде не треба да протестира, бидејќи ако имаат можност за развој и да имаат добивка во животот, тоа е оваа соработка меѓу државите, му порача Коѕијас на префектот во кусиот дијалог пред камерите.

Коментирај