Високиот крвен притисок или хипертензијата е честа медицинска состојба.
Иако бројот на заболени од хипертензија е голем, многу граѓани не знаат дека ја имаат, со оглед на тоа дека состојбата нема речиси никакви симптоми.
Висок крвен притисок се дијагностицира кај оние кои имаат вредности на крвниот притисок повисоки од 140/90 mmHg. Нивното срце мора да работи понапорно за да пумпа крв низ телото, а со текот на времето тоа предизвикува оптоварување на срцето, но и на другите органи и крвни садови и може да предизвика непоправлива штета. Хипертензијата е исто така фактор за многу сериозни здравствени состојби и болести, вклучувајќи срцеви заболувања, бубрежни заболувања, мозочен удар, срцева слабост и срцев удар.
Една од причините за висок крвен притисок е исхраната, особено храната со висока содржина на сол. Меѓутоа, како што солта може да го зголеми крвниот притисок, има и намирници кои можат да го намалат. Калиумот е минерал кој се наоѓа во одредени намирници и може да ублажи некои од проблемите предизвикани од прекумерното внесување натриум. Затоа, се вели дека консумирањето храна богата со калиум може да им помогне на оние кои страдаат од хипертензија.
„Храната која е богата со калиум е важна во контролирањето на високиот крвен притисок бидејќи калиумот ги намалува ефектите на натриумот. Колку повеќе калиум јадете, толку повеќе натриум губите во урината. Калиумот исто така помага да се намали напнатоста на ѕидовите на крвните садови, што дополнително помага во намалување на крвниот притисок“, велат од Американското здружение за срце (AHA).
Бананите често се сметаат за главен извор на калиум. Секои 100 грама банана содржи 330 мг калиум. Сепак, постои уште едно овошје кое содржи уште повеќе калиум. Станува збор за суви кајсии кои имаат околу 1162 mg калиум на 100 грама производ.
„Бидејќи сувите кајсии содржат калиум, тие може да го намалат нивото на крвниот притисок. Истражувањата покажаа дека калиумот може да го намали високиот крвен притисок кај пациенти со хипертензија“, додава AHA.
Сувите кајсии се исто така поврзани со подобрување на здравјето на срцето, здравјето на очите, здравјето на имунолошкиот систем и намален ризик од дијабетес.
