Малку работи се поубави од моментот кога ќе се вратите дома и кучето ќе ве пречека мавтајќи со опашката, но експертите за однесувањето на животните сакаат да знаете дека мавтањето со опашката не значи секогаш дека кучето е среќно што ве гледа.
Кучињата изразуваат емоции со опашките, објаснува експертот за однесувањето на кучињата Катја Краус за германската новинска агенција Deutsche Presse-Agentur.
Но, додека ние луѓето сметаме дека тоа значи среќа - тоа е всушност само знак на возбуда кај животното, вели таа.
Ако сакате точно да одредите што се случува, обрнете внимание на висината на опашката и колку брзо се движи - ова исто така ќе ви открие дали кучето е среќно, исплашено или агресивно.
Речиси е правило дека чувството на напнатост е поврзано со интензитетот на мавтањето на опашката - колку побавни и понежни движења на опашката, толку помалку напнатост чувствува кучето.
Работите се различни ако опашката се движи побрзо и не мавта во широк опсег. Затегната опашка што стои исправено и прави мали движења значи конфликт, а истата порака ја испраќа и исправена опашка што престанува да се движи.
Среќните кучиња обично мавтаат со опашката високо подигната и речиси во кругови, вели Краус. Но, понекогаш дури и среќното куче може брзо и остро да мавта со опашката.
За да го разликувате расположението на кучето, треба да ја набљудувате опашката во различни ситуации, на пример, кога знаете дека кучето се чувствува загрозено од доаѓањето на друго куче.
Исто така, помага кога ќе се земат предвид карактерот на кучето, неговата анатомија и останатите пораки што ги праќа со говорот на телото.