Дуелот меѓу Голден Стејт и Денвер изобилуваше со тензични ситуации, а посебно на мета на домашните кошаркари беше Никола Јокиќ.
Кошаркарите на Вориорс користеа секакви „финти“ за да го испровоцираат најдобриот кошаркар на Денвер, а „екипата“ ја водеше Дрејмон Грин. Сепак, потегот по кој на Јокиќ му „пукна филмот“ го направи Гери Пејтон II.
Синот на легендарниот Пејтон прво го блокираше Јокиќ на крајот од првата четвртина, а откако акцијата заврши, тој во минување лежерно го удри српскиот центар по задникот.
Ова го налути Јокиќ, кој се упати кон Пејтон за физички да се пресмета со него, но за среќа Стеф Кари скокна и успеа да го смири центарот на Денвер и да спречи физички конфликт.
Сепак, Јокиќ продолжи да се нервира во текот на играта и поради потезите на играчите на Вориорс и поради дискутабилните одлуки на судиите, а во последната четвртина доби уште една техничка по која мораше да го напушти паркетот.
Голден Стејт победи со 126:106 и поведе со 2-0 во серијата од првото коло од плејофот на Западната конференција.