Во Германија минатата година се украдени помалку автомобили од претходната, но штетата е поголема, бидејќи главно се крадат луксузни автомобили, соопшти денеска Сојузот на германските осигурителни компании (ГДВ).
-Бројот на украдени автомобили е 17.493, што е за 4 отсто помалку отколку во 2016 година, но штетата порасна за 8 проценти, така што за изминатата година изнесува 324 милиони евра, стои во соопштението.
Статистиката се однесува на автомобилите кои се осигурени од кражба. Просечната исплата на отштета, исто така, достигна рекорден износ, а исплатени се 18.500 евра.
На врвот на листата на најчесто украдени автомобили се наоѓаат воглавно скапи теренски возила, а на прво место, со 15,3 украдени автомобили на 1.000 регистрирани возила од тој тип, се наоѓа Audi Q7 3.0 TDI, зад кој следи Mercedes ML 63 AMG, па теренското возило на Mazda CX-5 2.2 d.
Опасноста дека автомобилот ќе биде украден е најголема во Берлин, а најмала во Баварија и Баден-Виртемберг.