Здравје

Кои пијалаци не треба да ги пиете во лето?

11. август 2018 - 11:38 | К.З.

Во текот на летните месеци температурите се качуваат и многу лесно може да се случи да дехидрирате. Поради тоа е важно да внесувате доволно течности за вашето тело да може да се избори со високите температури. Меѓутоа, многумина прават грешки со изборот на пијалак и наместо да ја спречат дехидрацијата, тие ја поттикнуваат.

Најдобриот пијалак за згаснување на жедта ви е секогаш достапен – вода. Но, доколку не сте голем фан на пиење вода во лето, советуваме барем да ги одбегнувате овие пијалаци.

Спортски пијалаци

Без разлика дали спортувате или не, спортските пијалаци изгледаат привлечно додека се во ладниот фрижидер, но треба да имате на ум дека тие се наменети за спортистите кои губат електролити како натриум и калиум поради напорните и долготрајните физички активности. Меѓутоа, тие содржат многу вештачки засладувачи и јаглехидрати кои содржат преку 100 калории и затоа не се препорачуваат за луѓе кои не се спортисти.

Пакувани сокови

Ако мислите дека пакуваниот сок е подобар за вас од газираниот сок, тогаш се лажете. Пакуваните сокови се штетни и имаат занемарлива хранлива вредност. Тие содржат големи количини шеќер и конзерванси, па поради тоа не можат да се сметаат како здрави. Тоа ваши и за соковите кои се на база на овошје.

Витаминска вода

Витаминската вода е една голема измама, нездрава и непотребна. Водата му е потребна на организмот, но ако пиете витаминска вода можете да претерате, посебно ако вашата исхрана содржи доволно витамини. Витаминската вода исто така содржи шеќер чија количина е понекогаш еднаква на онаа од Coca Cola.

Леден чај

Ледениот чај е многу вкусен пијалак, посебно за време на летото. Сепак, треба да се земе предвид дека ледените чаеви содржат шеќер, дури и оние „диетални верзии“ на ледени чаеви. Но, ледениот чај не е толку лош бидејќи е богат со антиоксиданси и го намалува ризикот од неколку болести.

Постојат алтернативи на сите овие пијалаци кои можете да ги направите во вашиот дом. Сварете чај и изладете го, за на тој начин да направите домашен леден чај. Исто така, можете на ладната вода да ѝ додадете лимон, праска или краставица.

Коментирај