Илон Маск ги набрка твитерџиите, се селат на алтернативни платформи.
Голем број корисници не се задоволни од начинот на кој Илон Маск управува со Twitter, ниту од промените кои милијардерот ги носи на социјалната мрежа, па бараат алтернативни платформи.
Радикалните потези на Маск, по преземањето на Twitter (отпуштање на илјадници работници, воведување задолжителна претплата за проверка на сметката, најава за враќање на блокираните профили и слично) ги натераа корисниците да размислуваат за префрлање на алтернативна платформа.
Неодамнешно истражување сугерира дека повеќе од милион луѓе веќе го напуштиле Twitter, од кои голем дел избраа неколку нови платформи слични на Twitter.
Mastodon се чини дека е најпопуларната опција во моментов. Оваа платформа, како и Twitter, се базира на објавување на кратки пораки. Секој корисник се најавува на независни сервери, кои ги има илјадници на број.
Основачот на Mastodon истакна дека на почетокот на неделата оваа платформа достигнала повеќе од еден милион месечни активни корисници, што секако не може да се спореди со 238 милиони активни корисници на Twitter, кои оваа социјална мрежа ги забележа во јуни.
Друга потенцијална мрежа која прифаќа „бегалци“ од Твитер е BlueSky, која ја започна еден од со-основачите на Twitter, Џек Дорси. Тука е и проектот Cohost, кој ветува дека нема да ги продава податоците на своите корисници.
Во екот на ситуацијата на Twitter, некои постари платформи, како што се Tumblr и Clubhouse, повторно станаа популарни.
Останува да се види колкава популарност ќе достигнат споменатите алтернативи, иако малкумина веруваат дека некоја од нив ќе го постигне успехот на Twitter во догледно време.
