Ново истражување на американски и француски научници покажа дека растителните извори на протеини се многу поздрави за срцето во однос на оние од животинско потекло, пренесува магазинот „International journal of epidemiology“.
Истражување на научници од калифорнискиот универзитет Лома Линда и државниот Институт за агрономски истражувања во Париз, покажа дека лицата кои јаделе поголеми количини на месо биле изложени на поголеми ризици од срцеви заболувања, но тој ризик бил значително помал кај оние кои протеините ги црпеле од растителни извори.
Научниците собирале податоци од 81.000 испитаници и заклучиле дека лицата во чија исхрана преовладувало месо, за 60 отсто биле повеќе изложени на ризик од срцеви болести во однос на луѓето во чија исхрана преовладувала храна од растително потекло или веганска храна.
Поточно, кај нив тој ризик бил помал за 40 отсто.
Главниот автор на истражувањето Гари Фрејзер од универзитетот Лома Линда, веќе долго време верува дека главните извори на протеини од растително потекло, како леќа, грашок, грав, кикирики и така натаму, го штитат организмот од развој на срцеви заболувања, а ова истражување само ја потврди неговата претпоставка.
Тој потсетува дека вегетаријанството најчесто се однесува на начинот на исхрана, додека веганството е животен стил.
Ниту веганите ниту вегетаријанците не консумираат месо, но јадат млеко, јајца и мед, а веганите од својата исхрана ги исклучуваат сите видови на храна од животинско потекло.
Фрејзер верува дека резултатите од ова истражување ќе поттикнат нови истражувања, околу тоа на кој начин есенцијалните аминокиселини од протеините од животинско потекло придонесуваат за зголемување на ризиците од срцеви болести, но и од зголемен крвен притисок, дебелина и зголемено ниво на маснотии во крвта.
За добивање на сите есенцијални аминокиселини важно е да се направи правилна комбинација на храна, а пример за тоа се оризот и грашокот.
И минатогодишно истражување поврзано со придобивките од пет различни типови на храна, покажа дека веганите во 42 отсто од случаите имаат помали шанси за заболување од срцеви болести, во однос на оние кои консумираат помалку овошје и зеленчук од нив.