Страшниот инцидент што резултираше со смрт на директорката на фотографија Халина Хачинс на филмскиот сет на „Rust“ минатата недела, остави отворени прашања поврзани со употребата на огнено оружје во забавната индустрија.
Во овој случај одговорноста е на продукцијата и на стручниот соработник за оружје, но нема строги прописи.
Актерот Алек Болдвин изјави дека срцето му е скршено откако во четвртокот за време на снимањето на филмот со истрел од пиштол ја уби Халина Хачинс. Режисерот Џоел Соуза, кој стоел зад Хачинс, е полесно повреден.
Споменатата трагедија поттикна многумина да се запрашаат кој е одговорен за безбедноста на оружјето на филмските сетови?
Одговорноста за употребата на пиштоли и друго оружје е на управителот на имотот на секоја продукција или на експертот за оружје ангажиран како соработник на сетот.
Тие го обезбедуваат оружјето кога не се користи и ги поучуваат актерите за правилна и безбедна употреба на оружјето. Тие исто така го полнат огненото оружје и го проверуваат пред и по секоја сцена.
Не постои конечен сет на прописи за употреба на огнено оружје
Според новинската агенција AP, американската Федерална агенција за безбедност на работното место не ја регулира безбедноста на оружјето на снимање, а многу држави и оставаат на филмската индустрија сама да ги креира и да ги следи сопствените правила.
Професорот Ден Леонард од Универзитетот Чепмен во Калифорнија, кој е специјализиран за регулативи за снимање, изјави за BBC дека „во голема мера е оставено на индустријата да развива и следи насоки... и тие насоки, доколку се следат, можат да овозможат безбедно користење на огнено оружје при снимање“.
Можеби најблиску до листата на предложени правила е листата објавена од Комитетот за безбедност при работа во целата индустрија.
Наведените совети вклучуваат препораки за третирање на сите огнени оружја како да се наполнети, а потоа се вели: „Воздржете се од нишанење со огнено оружје кон себе или кон кој било друг. Никогаш не ставајте го прстот на чкрапалото освен ако не сте подготвени да пукате. Секој кој е вклучен во употребата за огнено оружје мора да биде детално информиран на состанокот за безбедност на сетот“.
Исто така, се посочува дека само квалификувано лице смее да наполни огнено оружје, а заштитни штитови, заштита за очи и слух треба да користат сите во непосредна близина или во сцената со пукање.
Но, Комитетот истакнува дека неговите насоки „не се обврзувачки закони или регулативи“ и, како што вели професорот Леонард, овој безбедносен документ се чини дека последен пат бил ревидиран во 2003 година.
Филмското студио Warner Bros објави свои правила за ракувањето сo оружје на сет, додека Здружението на актери има совети за ракување.
Ќе се воведат ли построги правила?
Инцидентите, како оној на снимањето на „Rust“, се неверојатно ретки, но сѐ повеќе поттикнуваат повици за забрана на вистинско огнено оружје на филмските сетови, а петицијата собра повеќе од 23.000 потписи до понеделникот. Актерката Оливија Вајлд беше меѓу оние кои дадоа поддршка.
Сенаторот од Калифорнија, Дејв Кортез, во саботата изјави дека ќе го поддржи нацрт-законот за забрана на муниција на филмските сетови во државата.
Професорот Леонард смета дека „потребна е построга примена на постоечките политики и поголема регулатива, особено за нискобуџетните вестерн филмови“.
Тој додава: „Ова ќе спаси животи. Никој не треба да умре снимајќи филм“.