Свет
РАСТЕ БРОЈОТ НА ЗАБОЛЕНИ ОД НОВИОТ КОРОНА ВИРУС

Кои земји се најмногу и најмалку подготвени да се справат со епидемија?

28. јануари 2020 - 19:02 | А.С.

Центарот за контрола и превенција на болести соопшти дека е пријавен уште еден случај на заболен од новиот корона вирус во САД, со што вкупниот број на заболени во земјата се искачи на пет.

Досега од корона вирусот починаа 107 лица, а заразени се речиси 4.600 луѓе. Корона вирусот се појави во Вухан, од каде се прошири низ Кина и во светот. Градот со 11 милиони жители моментно се наоѓа под целосен карантин. 

Иако кинеските здравствени служби рекоа дека вирусот се шири при контакт човек на човек, американските служби препорачуваат највисоки мерки за заштита од зараза.

Со оглед на тоа дека ситуацијата со ширењето на корона вирусот се менува брзо и самата СЗО вчера излезе со различни ставови во врска со степенот на заканата на меѓународно ниво, се поставува прашањето: Кои земји се најмногу и најмалку подготвени да се справат со епидемија?

Лани во октомври беше објавен Global Health Security Index кој содржи проценка на здравствената безбедност во 195 земји.

Особено биле анализирани нивоата на подготвеност со фокус на тоа дали земјата има соодветни алатки за справување со сериозна епидемија на болест.

Земјите беа рангирани на скала од 0 до 100, при што 100 е највисоко ниво на подготвеност.

САД се сметаат за земја со најголема подготвеност и најсилни мерки на располагање, со 83,5 од можни 100 бода.

Обединетото Кралство на Англија, Шкотска, Велс и Северна Ирска е на второ место со 77,9 и по неа е Холандија со 75,6.

Кина во 2019 година се рангирала на 51. место со 48,2 бода.

Според мапата, Република Северна Македонија спаѓа во земјите кои се „подготвени“ да се справат со епидемија.

Африканските земји се особено ранливи по ова прашање. Најмалку подготвени се Сомалија и Екваторска Гвинеја со 16,6 односно 16,2 бода на скалата на Global Health Security Index.

Коментирај