Ова е главниот кандидат за рушење на владеењето на Орбан: католик, татко на седум деца, економист...
Петер Марки-Зај, првиот човек во малиот град Ходмезовасархели, политичар без партиско потекло, победи на неделните опозициски избори за заеднички кандидат кој ќе му се спротистави на премиерот Виктор Орбан на парламентарните избори во 2022 година.
Во вториот круг, Марки-Зај освои повеќе гласови од левичарската кандидатка Клара Добрев, која го призна поразот и му вети дека ќе го поддржи како кандидат на шест опозициски партии што ќе му се спротивстават на Орбан, обидувајќи се да го симне од власт по повеќе од една деценија.
„Му посакувам многу сила... во обид да го собори Виктор Орбан и да го собори неговиот режим“, рече Добрев на прес-конференција.
Опозициска коалиција од социјалистите до крајната десница
На парламентарните избори следната година, Орбан, за првпат од доаѓањето на власт во 2010 година, ќе се соочи со обединет фронт на опозициските партии составени од социјалисти, либерали и поранешната екстремна десница, сега десниот центар Јобик.
Со имиџот на семеен човек и католик, Марки-Зај се покажа како соодветен кандидат и за левицата, и за конзервативните гласачи.
Со преброени 60 проценти од гласовите на последните избори во неделата, Марки-Зај има јасно недостижно водство со 230.112 гласови, додека Добрев, политичарка од Демократската коалиција, правник и дипломиран економист, доби 167.060.
„Само заедно можеме да победиме“, им рече тој на собраните поддржувачи и извика: „Никој не може да го наруши единството на опозицијата“.
За 49-годишниот татко на седум деца со диплома по економија и маркетинг првпат се слушна во политичките кругови кога победи на изборите за градоначалник во 2018 година во неговиот роден град, упориште на владејачката партија Фидес.
Коалиција на „чистите“
Анкетите покажуваат дека владејачката партија Фидес на Орбан и опозициската коалиција водат мртва трка.
Марки-Зај ја водеше кампањата како лидер на Коалицијата на „чистите“, ветувајќи дека ќе ја искорени корупцијата и ќе стави крај на 30-годишната длабока поделба во политиката и општеството.
Двајцата кандидати сакаат да ја сменат она што тие го нарекуваат „нелиберална држава“ на Орбан, која ги вклучува нејзините идеолошки основи, како и унгарскиот став и голем број важни закони, за кои критичарите велат дека му помогнале на Орбан да ја консолидира својата моќ.
И додека Орбан води разни битки со Европската Унија, и Марки-Зај и Клара Добрев сакаат да ги подобрат односите со Брисел, и двајцата се залагаат Унгарија да го воведе еврото во догледна иднина.