Во општеството во кое живееме навистина е тешко да се издржи без стрес, претеран напор и замор на крајот од денот. Сите овие работи влијаат на спиењето, поточно на несоницата, за која најдобро е да најдете лек што побрзо, пред таа да почне да му штети на вашето здравје.
Најстрашните симптоми од несоницата доаѓаат кога ќе се појави хронична несоница, односно кога пречките во спиењето ќе траат подолго од шест месеци. Во такви случаи несоницата тотално го обзема денот и почнува да прави здравствени проблеми, потешкотии со дигестивниот систем, главоболки и мигрени, а во најсериозните случаи може да биде и причина за депресија.
„Знаеме многу малку за несоницата бидејќи таа е индивидуален проблем кај секој пациент, па мораме да ја третираме различно секојпат кога ќе се сретнеме со неа. Некој не може да спие поради стрес, некој е премногу уморен и заборавил како да се опушти, трет пак можеби има здравствен проблем кој не му дозволува да спие мирно. Не можеме да најдеме универзален лек за сите овие случаи“, вели Клер Ечисон, докторка во институтот во Норвич.
Кога за првпат ќе се појави несоницата, поголемиот дел од луѓето решаваат да се свртат кон апчиња кои ќе им помогнат да заспијат, но докторите сметаат дека ова не смее да биде првиот чекор кон лекување на несоницата. Ако прерано почнете со апчиња, телото со тек на време ќе стане имуно на нивното дејство и потоа нема да можете да преземете ништо повеќе.
Докторите би препорачале различни решенија за овој проблем, со цел пациентите да не почнат да го решаваат проблемот со лекови земени на своја рака. На пример, докторите би препорачале да ги исфрлите лошите навики од вашето секојдневие. Лошата храна, претераниот стрес на работното место и спиењето во различно време секоја ноќ влијаат на појавување на несоница, па затоа докторите би ви препорачале да се обидете да ги решите овие проблеми пред да барате решенија кои вклучуваат апчиња и терапии.
Наместо лоши, вметнете добри навики во вашиот ден, посебно во ноќта. Истуширајте се со топла вода пред спиење, бидејќи топлата вода ќе го снижи притисокот и ќе ви помогне да се опуштите. Исклучете го телефонот и во никој случај не го земајте во раце додека се обидувате да заспиете, бидејќи на тој начин додавате уште една пречка која ве дели од здравиот сон. Некои доктори би препорачале јадење банана пред спиење, додека други одат дотаму што препорачуваат мастурбација пред спиење, која го има истиот ефект како и топлиот туш, со тоа што таа дополнително ќе ве ослободи од стресот.
Пробајте да смислите ваш личен ритуал пред спиење, кој ќе му сигнализира на телото дека е време за спиење. Ова можете да го направите самите, но исто така можете да најдете помош во некоја од бројните смартфон апликации кои се наменети токму за овој проблем. Несоницата не смее да биде сфатена наивно, затоа грижете се за вашето здравје пред да биде доцна.
