Видео снимено за време на нападот на приврзаниците на Доналд Трамп врз зградата на Конгресот, веројатно најдобро сведочи за природата на конфликтот што го шокираше светот.
Токму поради тој упад, односно немирите и насилството предизвикано од приврзаниците на Трамп, беше инициран и изгласан импичмент на претседателот во заминување, кој е обвинет за повикување и поттикнување немири.
Најгледаното видео од тој настан го направи новинарот на онлајн изданието на Huffington Post Игор Бобиќ и најдобро покажува дека полицаец со афроамериканско потекло всушност спречил уште поголем конфликт.
Видеото покажува конфронтација меѓу полицаец и група претежно бели бунтовници кои упаднаа во Капитол хил на 6 јануари во обид да го оспорат резултатот од минатогодишните претседателски избори во САД на кои Џо Бајден го победи Трамп.
Видеото брзо стана вирално на социјалните мрежи, а полицаецот беше прогласен за херој бидејќи им се спротивстави на напаѓачите кои постојано му се приближуваа 85 секунди, без употреба на насилство или смртоносна сила.
За време на тој напнат конфликт, полицаецот двапати се повлекуваше по скалите, но експертите велат дека тој всушност не се повлекол, туку дека ја влечел бесната толпа од салата каде што седи Сенатот, тогаш полн со сенатори заштитени од вооружени полицајци, вклучително и еден со полуавтоматско оружје.
Полицискиот оддел во Капитол не го откри идентитетот на полицаецот, но тројца негови пријатели за Washington Post изјавија дека станува збор за Јуџин Гудман од државата Мериленд.
Кирк Буркелтер, професор по право на Правниот факултет во Њујорк и поранешен полицаец во градскиот полициски оддел, за Washington Post изјави дека Гудман со тоа веројатно спречил избувнување на насилен судир и поголема трагедија.
„Ако постапеше поинаку, можеше да има многу повеќе жртви тој ден“, рече тој по проверката на наведените снимки.
„Овие луѓе дојдоа таму со пластични лисици. Не е неразумно да се мисли дека беа подготвени да земат заложници... Полицаецот Гудман значително помогна да се спречи поголема трагедија“.
Инаку, во немирите тој ден беа убиени пет лица.
