Се појави видео од Вадим Шишимарин (21), првиот руски војник кому му се суди за воени злосторства извршени во Украина.
Станува збор за 21-годишен војник од тенковската дивизија Кантемировскаја, од Московската област.
Тој денеска се појави пред судот во Киев, каде ќе му се суди за убиство на 62-годишен украински цивил. Нему му се заканува доживотна затворска казна за убиството на маж на 28 февруари во селото Чупахивка, источно од Киев.
Според обвинението, војникот, во обид да побегне од украинските војници со украден автомобил, застрелал 62-годишен маж на велосипед кој зборувал на мобилен телефон.
Обвинителството не открива како бил фатен војникот, ниту подетално извести за доказите кои би укажале на воено злосторство. Истрагата ја спроведе Украинската служба за безбедност (SBU).
Меѓународниот кривичен суд (ICC) кон крајот на април објави дека ќе учествува во заеднички тим од украински, полски и латвиски обвинители кои ги истражуваат наводите за наводни воени злосторства од страна на руските сили.
