Чешката автомобилска компанија Škoda официјално го назначи наследникот на поранешниот претседател Бернхард Маер.
Позицијата му припадна на Томас Шејфер, досегашен претседавач на одборот и управен директор на Volkswagen во Јужна Африка.
Шејфер стана претседател на управниот одбор на Škoda, а претходно обавуваше функции на различни нивоа во групацијата Volkswagen.
Педесетгодишниот Германец, роден во Марбург, ја почна кариерата во Daimler во 1991 година, каде обавуваше неколку функции во управување со производството и квалитетот, а во текот на кариерата работел во Германија, САД и во Јужна Африка.
Во 2002 година стана член на управниот одбор за технологија во компанијата DaimlerChrysler Малезија, каде последна функција му беше водење на испораките, центрите за потрошувачи и глобалниот xKD бизнис.
Од 2005 до 2012 работел за Daimler во Германија, а во 2011 година неговото главно задолжение било менаџирањето на изградбата на фабриката на Mercedes-Benz во соработка со BAIC во Кина.
Од 2015 година, тој ја имаше функцијата претседател и директор на Volkswagen групацијата во Jужна Африка, задолжен за развој на брендовите на групацијата во суб-сахарскиот африкански регион. За време на неговиот престој таму, тој ги одведе Volkswagen, Audi и комерцијалните возила на Volkswagen до актуелниот рекорден удел на пазарот од 23,5 проценти.
Шејфер го наследува Маер, кој ја напушти Škoda во јуни откако пет години беше задолжен за надзор на лансирањето нови производи, вклучувајќи ја актуелната понуда на SUV модели. Се шпекулира дека Маер ги вознемирил членовите на управата на групацијата Volkswagen со ширењето на продажбата на клучните пазари за VW, благодарение на пониските цени кои се резултат на помалите трошоци за производство во Чешка.
Уште не е познато која е стратегијата на Škoda со носењето на кадар како Шејфер, но сигурно е дека Германецот има повеќе од доволно искуство да го зацврсти чешкиот бренд на глобално ниво. Се очекува Шејфер да продолжи со развивање на потенцијалот на брендот кој наидува одличен прием меѓу купувачите, а покрај во Европа, е присутен и на кинескиот пазар.