Сите очи се вперени во натпреварите од Светското првенство во Катар. Англија ја започна својата успешна кампања на Мундијалот со 6:2 против Иран во својот прв натпревар. Вчера Шпанија ја „уништи“ Костарика со 7:0. Фудбалските статистики се секогаш интересни, особено кога станува збор за рекорди.
Но, кој е рекордот за најмногу постигнати голови од една репрезентација на еден натпревар на Светското првенство - и како се споредува учинокот на Шпанија вчера со претходни натпревари каде што бројот на голови бил висок?
Ајде да погледнеме.
Рекордот за најголем број на голови постигнати од една страна на еден натпревар на Светско ѝ припаѓа на Унгарија.
Во 1982 година, унгарскиот национален тим играше со Ел Салвадор и му нанесе катастрофален пораз од 10:1.
Неколку други репрезентации ги добиле своите натпревари на Светското првенство со девет гола разлика, вклучувајќи ги Унгарија против Јужна Кореја (9:0) во 1954 година и Југославија против Заир (исто така со 9:0) во 1974 година.
Што се однесува до најголемиот број на голови во квалификацискиот натпревар за Светското првенство, австралискиот пораз врз Американска Самоа со 31:0 кога се обидуваше да влезе на Светското првенство во 2002 година дефинитивно ја зема титулата.
Има уште неколку интересни случаи што треба да се забележат.
Во 1954 година, натпреварот на Светското првенство помеѓу Австрија и Швајцарија кулминираше со вкупно 12 гола - со 7 за Австријците и 5 за Швајцарците - создавајќи рекорд за најмногу голови од двете селекции во едно соочување на Светско првенство.
Унгарија има уште еден рекорд - постигна неверојатни 27 гола на Светското првенство во 1954 година, што ја прави земја со најмногу постигнати голови на едно Светско првенство.
Бразил моментално го држи рекордот за најмногу голови на Светските првенства низ годините, со вкупно 229 од 1930 година до денес, според Sporting News.
Легендарниот фудбалер Жуст Фонтен го држи рекордот за најмногу постигнати голови од поединец на еден Мундијал - постигна 13 гола за Франција на шест натпревари на Светското првенство во 1958 година.
