Србија ги зголеми своите резерви на злато за повеќе од 10 тони за една година и во моментов има 32 тони во вредност од 1,66 милијарди евра.
Некои балкански земји, како што е Хрватска, немаат ни грам. Од друга страна, некои земји во регионот го користеа своето злато како гаранција за позајмици и кредити.
Податоците од Светскиот совет за злато (World Gold Council), најточната база на информации за резервите по држави, за вториот квартал од оваа година покажуваат дека по Србија, Република Северна Македонија има најголеми резерви на злато на Балканот - 6,89 тони.
Следува Словенија со 3,17 тони, Босна и Херцеговина со 2,98 тони и Црна Гора со 1.090 килограми злато кои се заложени за кредит. За Хрватска, бројката е нула.
Според податоците објавени на веб-страницата на НБРМ, на крајот на септември 2020 година, официјалните девизни резерви на Република Северна Македонија изнесуваат 3.480,2 милиона евра. Најголем дел од девизните резерви се пласирани во хартии од вредност (76,3%), по што следуваат валутите и депозитите (13,5%) и монетарното злато (10,2%).
Од ноември минатата година до денес, резервите на злато во Србија се зголемија од 21 на 32 тони, а нивната вредност е вкупно 1,66 милијарди евра. Станува збор за 2.500 златни шипки, од кои секоја тежи по 12,5 килограми. Нивните димензии се 17,78 × 9,21 × 4,45 сантиметри.
Повеќето средства се чуваат во трезорот на Народната банка на Србија (НБС), односно две третини, а остатокот е на сметките на НБС во странство.
Претседателот на Србија, Александар Вучиќ, неколкупати зборуваше за потребата од зголемување на резервите на злато во државата, потенцирајќи дека повеќе златни шипки значат поголема безбедност за земјата. Скоро истите пораки ги испратија лидерите на многу земји во регионот, како што се Романија, Унгарија, Словачка, па дури и Турција, додека Полска врати 100 тони во својата земја.
Златото во некои големи сили сочинува до 70 проценти од вкупните девизни резерви.
Хрватска ги продаде своите последни резерви на злато во 2001 година, според Lider.
Тогаш ХНБ реши да продаде 13,127 тони златни резерви по тогашната цена од 272 долари за унца, што ѝ обезбеди на државата околу 115 милиони долари. Останатите резерви на злато „исчезнаа“ во 2005 година по цена од 496 долари за унца, додека Хрватска заработи околу 31 милиони долари.
Значи, оваа земја го продаде своето злато за 146 милиони долари, а денес според Lider можеше да добие 710 милиони долари за тоа.
Резервите на црногорско злато од 38.477 унци или 1.090 килограми, наследени од поранешна СФРЈ, не се зголемени ни за грам и не се во земјата. Имено, во 2017 година тие беа заложени по трет пат за заем во Credit Suisse. Златото ќе остане таму до 2027 година додека не се отплати кредитот што е земен на 10 години.
Црна Гора има 1,7 грама злато по глава на жител во државните резерви. Ова е барем груба пресметка кога 1.090 килограми се поделени со бројот на жители според последниот попис - 625.266 жители.
„Златните резерви се заложуваат за заем во износ од 78 милиони евра, склучен со Credit Suisse AG Londonво април 2017 година. Аранжманот за заем е поделен на две транши, едната во износ од околу 48 милиони, а другата 30 милиони евра и како залог заложена вкупни државни резерви на злато “, соопшти тогаш црногорското Министерство за финансии.
Златото ги претставува и девизните резерви. Овој благороден метал служи и како гаранција за доверба во централната банка, особено во тешки времиња. Покрај тоа, на оваа форма на средства е потешко да се влијае преку политиките за каматни стапки на различни монетарни власти, додека обично служи како форма на заштита од инфлација на долг рок.
