НАСА избра три компании кои ќе развијат и изработат вселенски летала со кои во наредниве години астронаутите ќе слетаат на Месечината во рамки на програмата Artemis.
Избрани се компаниите Blue Origin на Џеф Безос, SpaceX на Елон Маск и американската Dynetics која е во сопственост на Leidos, чиј извршен директор е Роџер Крон.
Вкупната вредност на договорите на трите компании, што ќе бидат склучени на период од 10 години, изнесува 967 милиони долари.
САД сакаат до 2024 година на Месечината да испратат уште еден маж астронаут и првата жена астронаут, а се планираат и други мисии. Мисијата во 2024 ќе биде првата мисија со човечки екипаж на Месечината по 1972 година.
Првата и воедно најмлада жена во вселената беше руската космонаутка Валентина Терешкова. Терешкова (родена на 6 март, 1937 г.) изведе самостојна мисија со Vostok 6 на 16 јуни, 1963 година. Има орбитирано околу Земјата 48 пати, поминала вкупно речиси три дена во вселената и уште е единствената жена која извела самостојна вселенска мисија.