Познатиот онлајн речник Merriam-Webster го прогласи зборот „вакцина“ за збор на годината бидејќи од лек против пандемијата на COVID-19 стана „политички аргумент и извор на поделба“ во општеството.
„Ретки се зборовите кои можат да изразат толку многу во одреден период“, истакнуваат од Merriam-Webster. „Зборот вакцина во 2021 година доби и други значења освен медицинското. За многумина, тој збор симболизира враќање на животот каков што беше пред пандемијата. Но, тој збор исто така е во центарот на расправи за личен избор, политичка ориентација, нееднаквост во здравството, безбедност во училиштата и друго“, стои во објаснувањето.
Според Merriam-Webster, најголемата научна приказна на нашето време брзо стана најголема дебата во нашата земја, а во самиот фокус на приказната е вакцината.
Зборот „вакцина“ е баран 601% почесто отколку што тоа беше случај во 2020 година.
Merriam-Webster исто така ја дополни и дефиницијата на зборот кој сега содржи и информација за РНА во производството на вакцини.
За потсетување, претходната 2020 збор на годината беше „пандемија“.
