Дина Болуарте стана првата жена претседател на Перу, среде политичките превирања кога нејзиниот претходник и поранешен шеф Педро Кастиљо беше сменет во судскиот процес за импичмент и приведен од полицијата откако се обиде незаконски да го затвори Конгресот.
Болуарте (60), која го започна вчерашниот ден како потпретседателка и следна во редот за замена на Кастиљо, сега се соочува со незавидниот предизвик да го излечи поделеното Перу, каде што претседателството е во расправија со Конгресот повеќе од една година.
„Барам политичко примирје за да воспоставам влада на национално единство“, рече таа во својот прв говор откако положи заклетва како шести претседател на земјата за само пет години.
Таа вети дека ќе формира широка влада „од секаква крв“.
„Барам време, драгоцено време за да ја спасам земјата од корупција и лошо владеење“, рече таа.
До неодамна, адвокатката беше релативно непозната за повеќето Перуанци - таа освои помалку од 4 проценти од гласовите на изборите за градоначалник на областа Лима во 2018 година, а загуби во трката за место во парламентот во 2021 година. Таа стана позната заедно со Кастиљо како потпретседателка на неговата листа кога „извлекоа“ изборна победа во 2021 година за екстремната левичарска партија Перу Либре.
По преземањето на функцијата, Кастиљо ја избра Болуарте за министер за развој и социјална инклузија, но во последните недели Болуарте се дистанцира од Кастиљо, поднесувајќи оставка како министерка, што би можело да ѝ помогне да остане на функцијата до 2026 година.
