Бизнис

Која е Мекензи Безос, жената која зеде 36 милијарди долари во разводот од најбогатиот човек на светот?

3. октомври 2019 - 15:44 | А.С.

Мекензи Безос 25 години беше во брак со основачот на Amazon Џеф Безос. Во далечната 1996 година делела канцеларија со помлад вработен во простор што бил дел од кујната на компанијата. Работела 12 часа на ден во одделението сметководството на Amazon, а ноќе одела во магацинот да пакува нарачки.

„Таа даде голем придонес во компанијата. Навистина е талентирана, но по малку се изгуби во улогата на сопруга на милијардер“, вели Мајк Хенлон, вработен во Amazon.

Мекензи Безос е жена која учествуваше во трансформацијата на малата онлајн книжарница во гигантот што е денес – компанија за онлајн трговија чија вредност се проценува на повеќе од 1 илјада милијарди долари.

Иако никогаш не сакала да биде во центар на внимание, веста за разводот од Џеф шокираше многумина, особено бидејќи тој веднаш јавно обзнани дека се забавува со друга жена.

Родителите на четири деца потпишаа развод во јули, а Мекензи со тоа доби 25% од акциите во Amazon. Тој удел моментално вреди 36,1 милијарда долари, што е доволно за да ја пласира Мекензи на 15-то место на листата најбогати жени според Forbes.

„Требаше да добие 50%. Сепак, Мекензи беше рамноправен партнер по основањето на компанијата“, рече Ник Ханауер, еден од првите инвеститори во Amazon.

Новинарите на Forbes се обидоа да дојдат до повеќе податоци за оваа мистериозна жена, па контактираа стотина нејзини пријатели и поранешни колеги.

Тие им дадоа информации што составуваат една нејасна слика за жената која навистина си ја сака приватноста и прави сѐ за да ја заштити.

Она шо го открија беше дека таа тивко се истакнувала во секоја фаза од животот.

Мекензи израснала во Сан Франциско како средно дете во семејството. Кога имала шест години напишала книга од 142 страници и ја нарекла „The Book Worm“. Родителите ја испратиле во интернатот Хочкинс во Конетикат, каде матурирала.

Студирала на Кембриџ, па на Принстон, каде дипломирала. Менторка за дипломскиот труд ѝ била нобеловката Тони Морисон.

Нејзините професори тврдат дека секогаш била добро расположена, но многу тивка.

По дипломирањето се вработила во фондот D.E. Shaw, каде почнала да се дружи со Џеф Безос. Таа била вклучена во создавањето на компанијата Amazon од самиот почеток, каде вложила сѐ што знаела.

Од компанијата се повлекла кога прв пат беа понудени нејзини акции на берзата во 1997 година. Изминатите 20 години од нејзиниот живот се вистинска мистерија за јавноста.

Во 2018 година заедно со Џеф издвоија 2 милијарди долари за борба против бездомништвото и дадоа поддршка на непрофитни установи за деца од предучилишна возраст. По потпишувањето на разводот Мекензи рече дека ќе донира половина од нејзиното богатство во хуманитарни цели, но не кажа на кои организации конкретно.

Коментирај