Антоан Гризман се врати во форма со головите за Барселона, по тешкиот старт на сезоната и бројните критики упатени на негова сметка.
Французинот постигна извонреден погодок во победата против Осасуна во неделата (4:0), а посебно внимание привлече со прославата на голот.
Новинарите беа љубопитни по ова прашање, а напаѓачот на Барса откри дека идејата ја добил од ќерка му, според танц од популарната видеоигра „Fortnite“.
„Појадувавме со ќерка ми и ја прашав како би сакала да го прославам следниот гол. Ми кажа како и јас така и направив. Тоа беше за неа. Многу е важно што победивме и се приклучивме кон врвот. Знаеме дека Ла Лига е долга и сакаме да бидеме прваци, а тоа е тежок пат“, изјави Гризман.
Французинот објави и видео на Twitter во кое покажа како се славело кај него дома, поточно како славела неговата четиригодишна ќерка Миа.
Гризман во дресот на Каталонците на сите натпреварувања во 12 натпревари досега сезонава имаше четири гола и две асистенции.