Пензиониран ФБИ преговарач во заложнички ситуации, иследник, инструктор и експерт советува која е најдобрата тактика да ги натерате луѓето да носат маска во време на пандемија.
Пред пандемијата со COVID-19 се објаснувавме со луѓе дека Земјата не е рамна, дека треба да ги вакцинираат децата, дека Месечината постои и дека еволуцијата навистина се случила. Борбата продолжува на овие теми, но на списокот луѓе со кои се објаснуваме се приклучија оние кои едноставно не сакаат да носат заштитна маска во време на пандемија.
Многу е важно да сфатиме како размислуваат и функционираат овие луѓе пред да преминеме кон објаснување зошто треба да се заштитат себе си и луѓето околу себе.
Гари Нојснер, пензиониран ФБИ преговарач во заложнички ситуации, иследник, инструктор и експерт советува која е најдобрата тактика да ги натерате луѓето да носат маска во време на пандемија.
„Прво, што не треба да правите? Расправањето, претерано конфронтирање, навредлив и понижувачки тон и речник, потсмевање, омаловажување на нивната загриженост, несослушување на нивната верзија на приказната, непристојност, обид да се поставите како доминантен соговорник или сезнајко, закани...“, советува експертот.
„Трупањето факти и логички заклучоци исто така нема да помогне. Ние сме имале работа со луѓе кои држеле заложници. Она што сме го научиле е дека луѓето сакаат да ги слушнете, да ги сослушате и да ги разберете. Сакаат да се однесувате кон нив со почит и искреност. Потребно им е да имаат прилика да ја искажат својата загриженост, проблеми и став. Преговарачот мора да слуша и да го признае туѓото гледиште, без да се согласи или да не се согласи со него“, вели тој.
Успешното преговарање се остварува со покажување искрена заинтересираност да му се помогне на другиот на мирен начин да се реши кризата, а не да се наметне авторитет. Смирениот и емпатичен тон исто така помага многу, советува Нојснер.
Не може да влијаете врз нечие мислење или однесување само со тоа што ќе им кажете што да прават. Убедувањето бара напор и труд, однос заснован врз почит и разбирање. Ако се потрудите да ја сфатите перспективта на другиот, да останете смирени и неагресивни, полесно ќе допрете до другиот и ќе може да ги изложите својата страна, својот став и своите причини.