Најниската минимална плата во Европската унија за месец јануари беше регистрирана во Бугарија, велат податоците обезбедени од европската статистичка служба Eurostat.
Во првиот месец од оваа година Бугарите имаа најниска минимална плата од сите земји-членки на Европската унија, и таа изнесуваше 261 евро.
Нешто повисоки минимални плати во Унијата имаат Литванија и Романија, каде тие изнесуваат 400, односно 408 евра. Според податоците од Eurostat може да се забележи дека минимални плати во износ од околу 500 евра имаат примарно земјите од источна Европа.
Голема разлика може да се види во минималните плати на двете екс-Ју земји кои се дел од ЕУ, Хрватска и Словенија. Минималната плата во Хрватска изнесува 462 евра, што е значително повисоко ниво од ситуацијата во Македонија, но Словенија ги надминува сите очекувања и таму минималната плата е 843 евра.
Највисоки минимални плати во Европската Унија имаат Ирска и Луксембург, а не заостанува многу ниту Холандија. Ирците кои работат за минимална плата заработуваат 1.614 евра, Холанѓаните 1.578 евра, додека во Луксембург таа изнесува дури 1.999 евра. За споредба, федерално прифатената минимална плата во САД изнесува 1.048 евра.
Мора да напоменеме дека некои од земјите-членки на ЕУ не се дел од ова истражување бидејќи тие немаат законски пропишана минимална плата. Се работи за Данска, Италија, Кипар, Австрија, Финска и Шведска.