Полските граничари откриле повеќе од 100 килограми кокаин на дното на Балтичкото Море за време на операции за заштита на критичната подводна инфраструктура, објавено е денес.
Седум лица се уапсени во случајот со запленетата дрога. Граничарите навеле дека на црниот пазар би можела да достигне вредност и до 60 милиони злоти или околу 15 милиони евра.
Земјите на Балтичкото Море се во состојба на подготвеност кога станува збор за инциденти кои се однесуваат на критичната подводна инфраструктура, а НАТО вети дека ќе го зајакне присуството во тоа подрачје по повеќе инциденти во текот на кои таквата инфраструктура претрпела штета која се смета за сомнителна.
Дрогата е пронајдена на морското дно во подрачјето на Гдањскиот Залив. Дополнително е откриено местото каде што се пронајдени наводните сторители, што довело до откривање на дополнителна количина дрога. Властите рекле дека, доколку бидат прогласени за виновни, притворените би можеле да добијат казни затвор во траење и до 20 години.
Од крајот на 2022 година во Балтичкото Море се случи низа инциденти кои ја погодија клучната европска инфраструктура на неговото дно, вклучувајќи гасоводи и електрични и телекомуникациски кабли, што го отвори прашањето за саботажи.
Поправките на подводната инфраструктура може да траат со месеци и чинат и повеќе милиони евра, а дури и помалите прекини може да предизвикаат сериозни нарушувања - од оневозможување на интернет купување до прекини во телекомуникациите. Заштитата на подводната инфраструктура е од исклучителна важност бидејќи повеќе од 95 отсто од глобалниот интернет сообраќај се одвива преку подводни кабли.
