Легендарниот италијански фудбалски судија и шеф на судискиот комитет на УЕФА, Пјерлуиџи Колина, ќе предложи револуционерна промена во изведувањето на пеналите.
Колина (65) важи за најлегендарниот фудбалски судија досега. УЕФА го назначи за прв човек на судиите во 2017 година, а со оглед на тоа што сѐ уште ја држи оваа функција, неговиот предлог може многу лесно да биде усвоен.
Италијанецот сака да го укине правилото дека играч може да постигне гол од пенал откако голманот ќе го одбрани неговиот удар од белата точка. Колина сака да му забрани на играчот што изведува пенал да постигне гол од одбиена топка, како и на кој било друг играч на неговиот тим.
Ваква ситуација се случува многу често и секако би се одразила на фудбалската игра. Според мислењето на Колина, ова би ги зголемило инаку намалените шанси на голманот да одбрани удар од белата точка.
„Верувам дека има голема разлика помеѓу шансите што ги имаат голманот и напаѓачот. Во просек, 75% од пеналите се реализираат, а често тоа е поголема шанса од онаа што се спречува со фаул. Покрај тоа, на напаѓачот му се дава дополнителна шанса да постигне гол по одбиената топка и одбрана на голманот. Според мене, голмани треба да се жалат на тоа“, рече прославениот поранешен судија.
Колина откри дека тој веќе го покренал ова прашање до ИФАБ (Меѓународниот одбор на фудбалските асоцијации), каде што побарал да се преиспита правилото. ИФАБ е одговорен за правилата на фудбалската игра и е единствениот што се зема предвид во професионалниот фудбал.
„Веќе го спомнав ова во дискусиите во ИФАБ. Едно од решенијата што ги предлагам е правилото 'еден удар', исто како и при изведувањето пенали по продолженијата. Нема одбиена топка. Или постигнувате гол или играте продолжува со гол-аут. Исто така, ќе се елиминира драмата што ја гледаме пред изведувањето на пенали со играчите кои втрчуваат од линијата“, додаде Колина.
Колина ја заврши кариерата во 2005 година, а во кариерата судеше финалиња на Лигата на шампионите, ЕУРО и Светско првенство, Олимписки игри и Купот на УЕФА. Тој е шесткратен добитник на наградата за најдобар судија во светот од Институтот за фудбалска историја и статистика (ИФФХС), по ред од 1998 до 2003 година.
