Постојат начини со чија помош може да ги одржуваме џемперите во топ форма во текот на зимата, па и подолго.
Според Тоња Харис, експертка за токсини од животната средина и основач на Slightly Greener, во просек џемперите би требало да ги переме меѓу второто и петтото носење, но истото зависи од фактори како што се начинот на кој џемперот се носи и од што е направен.
Ако, на пример, сте носеле нешто под џемперот, тоа ќе го продолжи векот на траење намалувајќи го бројот на перења.
Што се однесува до материјалот, парчињата облека направени од памук, кашмир и свила треба да ги перете по две до три носења, додека поиздржливите материјали како волна или отпорни синтетички мешавини може да се носат до пет пати.
Значи, дефинитивно не треба да го перете џемперот секој пат кога го носите, а ако сакате да го распоредите времето меѓу перења, најдобро е да носите поткошула.
Како да ги одржите џемперите низ секое перење?
Како прво, секогаш проверувајте ги упатите за нега и одржување на етикетата, без разлика на материјалот.
„Ако можат да се перат во машина, перете ги на програма за чувствително или рачно перење, во студена вода“, советува Тоња, додавајќи дека топлината може брзо да ги собере џемперите.
За дополнителна заштита, џемперите може да ги перете рачно во када, со нежен детергент. По перењето не го цедете џемперот, оставете да се исуши на воздух, не во машина за сушење алишта.