Неотпакуван примерок од првата генерација на iPhone е ставен на аукција во САД и се очекува да достигне цена од повеќе од 50.000 долари.
Во моментот на пишување, понудената цена за уредот е 2.750 долари, а до крајот на аукцијата остануваат уште нешто повеќе од 16 дена.
Сопственичка на телефонот е уметницата Карен Грин, која го добила на подарок во 2007 година. Бидејќи во тоа време веќе имала нов мобилен телефон, а ајфонот тогаш не бил компатибилен со нејзината мобилна мрежа, го оставила неотпакуван, „завиткан во фланелни пижами“.
Во октомври стапила во контакт со аукциската куќа LCG Auctions и им го понудила својот iPhone. Таа решила да оди на аукција за да собере пари за да отвори ново студио за тетовирање.
Телефонот од првата генерација на iPhone е произведен во 2007 година и доаѓа со 8GB простор и има камера од 2MP.
Првата генерација на Apple iPhone, во времето кога се појави, чинеше 499 долари за модел со 4 GB меморија или 599 долари за модел со 8 GB простор за складирање податоци.