BMW изминатиов викенд го претстави најлуксузното купе во својата понуда, а само неколку дена подоцна ја објави и цената на овој модел во Германија.
Моделот за кого овие денови многу се зборува во медиумите кои ја следат автомобилската индустрија, на почеток ќе биде достапен во две верзии - 840d со дизел мотор и M850i со бензинец, а двете варијанти се опремени со xDrive погон на сите четири тркала.
Кога на есен ќе се најде во продажба на германскиот пазар, BMW 840d ќе има почетна цена од точно 100.000 евра, додека M850i ќе чини една четвртина повеќе, односно 125.700 евра.
За потсетување, дизелот за погон користи шестцилиндарски 3.0 литарски твин-турбо агрегат, кој испорачува 320 коњски сили, што овозможува забрзување од 0 до 100 километри на час за 4,9 секунди.
Моќниот BMW M850i xDrive користи нов 4.4 литарски твин-турбо V8 агрегат кој располага со 530 коњски сили, а од 0 до 100 километри на час забрзува за само 3,7 секунди.
И двата мотори се во пар со автоматизиран менувач со осум брзини.