Шолја кафе, секојдневната рутина со која многумина го започнуваат денот, ги чини македонските граѓани за 18,3% поскапо отколку една година порано.
Граѓаните на ЕУ, пак, пијат кафе поскапо за 16,9%, покажуваат податоците на Евростат за август 2022 година, споредено со истиот месец лани.
За оние кои го пијат кафето со млеко или шеќер, овој утрински ритуал може да биде уште поскап и да стане луксуз бидејќи цените на тие артикли се зголемени уште повеќе во текот на изминатата година. Цената на свежото полномасно млеко во Северна Македонија е зголемена за 29%, а на шеќерот за 58%.
Во земјите од ЕУ, пак, во просек млекото поскапело за 24,3%, а шеќерот за 33,4%, најмногу во Полска за дури 109,2%.
Според податоците на Евростат, цените на кафето, млекото и шеќерот се зголемиле во сите земји-членки на ЕУ, освен во Малта.
Кафето најмногу поскапело во Финска (43,6%), во Литванија (39,9%) и во Шведска (36,7%)
Млекото во Литванија (58,2%), во Хрватска (41,2) и во Естонија (38,9%).
Шеќерот, пак, во изминатата година најмногу поскапел во Полска (109,2%), во Естонија (81,2%), Латвија (58,3%) и во Бугарија (44,9%).