Факт е дека коронавирусот SARS-CoV-2 предизвика силна и брза пандемија, но многумина се прашуваат колку капки се потребни за некој да се зарази и заболе од COVID-19.
Според микробиологот Вилем ван Шајк од Универзитетот Бирмингем, доволни се неколку стотици и илјади честички со овој вирус за да се предизвика инфекција.
Просечниот број на вирусни честички потребен кај повеќето заболени се смета за многу низок, а ако пациентот примил поголема доза, кај него често и симптомите се далеку потешки.
Од друга страна, вирусно оптоварување е количината на вирусни честички кои заразениот ги носи и ги шири по околината. Како што пластично тоа го опишува д-р Едвард Паркер од Лондонскиот факултет за хигиена и тропска медицина, „вирусното оптоварување покажува колкав оган гори во заболениот, а инфективната доза е онаа искра со која може заразата да ја пренесе на некој друг“.
Според тоа, лесно може да се заклучи дека е најмалку опасно, на пример, ако престојуваме многу кратко во присуство на личност која многу малку го шири вирусот (на пример, некој кој е пред излекување, односно со негативен тест и без симптоми).
Најмногу е опасно ако престојуваме долго во присуство на многу пациенти под тешко вирусно оптоварување, како болничка соба за интензивна нега.
Едно кивање е доволно во воздухот да се исфрлат повеќе од 30.000 капки кои летаат со брзина од 300 км/ч. Тие може да содржат до 200 милиони вирусни честички кои се шират пред да паднат на подот.
При кашлање, 3.000 капки може да летнат во еден здив и тоа со брзина од 80 км/ч. Дишењето е најмалку ризично, во еден здив се ослободуваат меѓу 50 и 5.000 капки кои летаат со мала брзина и брзо паѓаат на подот. Со оглед на тоа дека овие капки не доаѓаат од белите дробови или носот, вирусното оптоварување е помало. Се смета дека при дишење заразениот не исфрла повеќе од 20 честички во минута, но ако зборува бројот расте на 200. Ако дише на нос, се намалува на 8 во минута.
Според тоа, ако некој ви кашла во лице или кивне во ваш правец, многу лесно може да вдишете 1.000 честички и да се инфицирате. Затоа, носете маска или брзо свртете се во друг правец. Дури и ако влезете во просторија во која некој кашлал и кивал пред една минута пак постои ризик.
Ако заразена личност нормално дише покрај вас, потребни се околу 50 минути да се заразите, ако ви зборува директно во лице, доволни се само 10 минути. Затоа, избегнувајте секаква интеракција лице в лице.
Што почесто проветрувајте ги просториите, особено ако во нив престојуваат повеќе луѓе. Ова важи за сите, особено за оние кои примаат пациенти, клиенти, ученици, странки, посетители и слично.