После единаесетгодишен пост Интер повторно е на врвот во Калчото, а тоа носи и добра финансиска заработка. Но, колку навистина ќе ќари миланскиот клуб?
Самото освојување на титулата во Италија носи разни бенефиции. Прво, Интер од ТВ-правата за преноси на своите натпревари од Серија А инкасира 23,4 милиони евра.
Првото место на шампионот му носи и директен пласман во групната фаза од Лигата на шампиони на УЕФА, за што само од учеството „Нераѕурите“ од европската куќа на фудбалот ќе добијат 30 милиони евра. Додатно на тоа, уште 10 милиони евра за ТВ-правата од ова елитно натпреварување.
Како првак на Италија Интер се здоби со право да учествува во италијанскиот Суперкуп за 2021 година кој е планиран да се одржи во Саудиска Арабија, а противник ќе биде победникот од Копа Италија, финале кое се игра сега на 19-ти помеѓу Аталанта и Јувентус. Учеството во популарната Суперкопа носи 3,4 милиони евра.
Тука се и 15-те милиони евра кои во клупската каса ќе влезат од спонзорите како награда за освоеното Скудето.
Тоа се вкупно 81,8 милиони евра. Од оваа сума играчите треба да поделат 22 милиона како награда за освоената титула, па со тоа на клубот би му останале 59,8 милиони евра. Но, наводно фудбалерите одлучиле да се откажат од парите за тие да останат во клупската каса.
Во секој случај, Интер добро ќе заработи од освојувањето на Скудетото што би требало да го стабилизира клубот финансиски за во наредните сезони.