Само две минути вежбање секој ден можат да бидат доволни за да го намалите ризикот од смрт на млада возраст, покажуваат истражувањата.
За да го продолжите животниот век не мора да правите нешто интензивно. Доволно е едноставно искачување по скали, прошетка до продавница или бавно трчање, пренесува Daily Mail.
Научници од Универзитетот во Сиднеј анализирале податоци од 70.000 Британци, следејќи го нивното ниво на вежбање во текот на еден ден како и нивната здравствена состојба во текот на следните 7 години.
Резултатите покажале дека луѓето кои неделно вежбале само 15 минути каква било телесна активност, поточно две минути и девет секунди дневно, имале 18% помала веројатност да починат во периодот на истражување од оние кои вежбале неколку минути неделно.
„Ова истражување ни потврди дека физичка активност од само неколку минути дневно може да биде доволна за да си го продолжиме животниот век за неколку години“, изјави авторот на студијата Метју Ахмади.
Со оглед на тоа што многумина како изговор велат дека немаат време за вежбање, ова револуционерно откритие може да им даде прилика дури и на оние најзафатените да ја задоволат дневната потреба за вежбање за која треба да одвојат само 2 минути од времето, советува тој.