Google им издаде извинување на корисниците на смартфони со оперативен систем Android, кои во петокот на сајтот „Reddit“, објавија дека опцијата за штедење на батеријата во нивните мобилни уреди се активирала сама, без нивно знаење или одобрување.
Според тврдењата на бројни сопственици на мобилни телефони со оперативен систем Android, кои за овој проблем дискутираа на Reddit, забележано е дека опцијата за штедење на батериијата неочекувано се вклучила на Google Pixel и Essential телефоните, дури и кај оние корисници кои претходно сами ја исклучиле опцијата.
Уредите кај кои се случило ова, ја имале инсталирано последната верзија на оперативниот систем на Google, Android Pie 9.0.
Кога е вклучена, опцијата за штедење на батеријата ги забавува перформансите на телефонот и оневозможува телефонот да прима и пребарува известувања во врска со прием на електронска пошта, известување околу ажурирање на апликациите и слично.
„Во прашање е интерен експеримент, чија цел е да се тестираат можностите на опцијата за штедење на батеријата, а во кој по грешка беа вклучени повеќе корисници, отколку што првобитно беше планирано“, стои во извинувањето од Google.
И додека на овој случај може да се гледа како на помал инцидент, помеѓу корисниците на Android уреди, на „Reddit“, сосема оправдано се отвори темата за тоа во која мерка и на кој начин Google може да воспостави контрола над паметните телефони, кои го користат оперативниот систем Android.
Значи, без разлика на тоа што станува збор за можеби не така голем проблем, сепак ова е очигледен знак дека Google во секој момент може да ги контролира Android телефоните, што секако не е добра работа за корисниците.
