Информациите кои доаѓаат од Унгарија велат дека трансферот на нивниот репрезентативец во Челси е завршена работа.
Периодов наголемо се шпекулира за новото засилување на „Сините“ кога станува збор за одбраната, а главното име кое цело време се врти во јавноста е она на Атила Салаи, кој настапува за Фенербахче.
Овој 23-годишен централен дефанзивец кој е висок 192 сантиметра и кој го носи името на славниот хунски освојувач Атила, во истанбулскиот клуб дојде пред 12 месеци и веќе влезе на радарот на европските гиганти.
За трансферот на Атила во Челси открива не било кој, туку селекторот на репрезентацијата на Унгарија, италијанскиот стратег Марко Роси. Тој тврди дека трансферот е договорен и ќе се случи веќе во зимскиот преоден рок.
„Верувам дека Атила ќе му се придружи на Челси. Јасно е дека него го следеа големи клубови од Шпанија, но очигледно неговиот трансфер во Челси е веќе договорена работа“, рече Роси за Calciomercato.
Него всушност го прашуваа кој играч од Унгарија би можел да биде добро засилување за клубовите од Серија А.
„Тешко е да издвојам само еден играч, но во моментов за таков го гледам Атила Салаи, кој игра во Фенербахче. Тој би бил големо засилување за самиот италијански фудбал“.
За Салаи досега интерес пројави шпанскиот гигант Атлетико, а се зборува дека и Барселона го следи веќе некое време. Сепак, како најсериозен се истакнува Челси кој наводно веќе договорил да исплати сума од 20 милиони фунти.
Томас Тухел уште летоска се обиде да ја засили одбраната, а приоритет му беше францускиот дефанзивец од Севиља, Жил Кунде, но не успеа да го донесе. Фактот што Антонио Ридигер, Андреас Кристенсен и Сесар Аспиликуета ќе станат слободни играчи нареднава година, а сѐ уште ги немаат продолжено договорите, јасно е зошто „Сините“ загризаа за унгарскиот колос.
Салаи пред да дојде во турската лига настапуваше за кипарски Аполон, унгарски Мезекевешд и виенски Рапид. За репрезентацијата на Унгарија има 16 настапи. Во јануари ќе полни 24 години.