Регион

Комшиќ му порача на Додик: Не се занесувајте со уцени, ништо од најавениот РС-егзит

18. февруари 2020 - 16:04 | МИА

Сараево, 18 февруари 2020 (МИА) – Претседавачот со Претседателството на БиХ, Жељко Комшиќ, изјави денеска дека нема ништо да има од најавениот „егзит“ на Република Српска, а на српскиот колега во државниот врв, Милорад Додик, му порача дека нема да добие ниту најмала отстапка околу статусот на Уставниот суд, пренесе сараевскиот весник „Дневни аваз“.

По повод вчерашниот говор на Додик во Народното собрание на Република Српска и најавената блокада во одлучувањето на заедничките државни органи, Комшиќ тврди дека сето тоа ќе ѝ се удри од глава и ќе ѝ нанесе најмногу штета токму на Република Српска.

-Нека во РС не се занесуваат со уцени. Нема да добијат ништо од тоа што го бараат, ниту било каква концесија што вообичаено е дел од тактиката. Бараш невозможно за да добиеш нешто. Ако е блокада, тогаш нека биде блокада, рече Комшиќ додавајќи дека „нема да има попуштања ниту за милиметар“.

Тој оцени и дека во РС се загрижени од плановите кои самите ги смислија, па сега е веќе очигледно, како што вели, дека се обидуваат да ја разводнат целата приказна околу блокадата на работата и одлучувањето во државните тела на власта во БиХ.

Коментирај