Претседателот на Барселона, Жоан Лапорта, на прес-конференција го откри начинот на кој 30.000 навивачи на Ајнтрахт од Франкфурт дојдоа на стадионот „Камп Ноу“ и им дадоа поддршка на своите играчи во реваншот од четвртфиналето на Лига Европа.
Заедно со Лапорта на прес-конференцијата имаше и вработен во клупскиот маркетинг кој објасни дека од 79.468 навивачи, 37.746 имале сезонски билети, додека биле продадени 34.435 карти. Според правилата, 5 илјади билети биле наменети за гостинските навивачи.
Понатаму истакна дека на билетарницата биле продадени 1.500 билети, а онлајн 23.427 билети. Откри и дека билети имале и посредниците и дека еден од нив згрешил и дека веднаш му бил раскинат договорот.
Лапорта нагласи дека контролните механизми функционирале многу добро и дека системот одбил повеќе од 27.000 барања за купување билети од Германија, но дека гостинските навивачи до билетите дошле преку групите за попуст на билети и претплати.
На тој начин, според шпанските медиуми, биле продадени повеќе од 7.000 билети.
„Клубот не е виновен за тоа што се случи на натпреварот против Ајнтрахт, но секако е одговорен. Ова не смее да се повтори. Клубот не им продаде билети на Германците, а ние ќе преземеме некои правни чекори. Важно е да се знае кој влегува на стадион и тоа не е спорно, влезницата може да се префрли, но важно е да се знае кој“, рече Лапорта и додаде:
„Не е забрането да се продава билет, не можеме да ставиме некој што продава во затвор, но можеме да го информираме“.
Потсетуваме, Ајнтрахт победи против Барселона со 3:2 и со тоа се пласираше во полуфиналето на Лига Европа.
