Велика Британија и Европската Унија постигнаа трговски договор само една недела пред крајот на преодниот рок за Брегзит и повеќе од четири години откако Британците гласаа за напуштање на Унијата, објави BBC.
Преговарачите на Велика Британија и ЕУ се состанаа доцна во ноќта и работеа на финализирање на договорот, а европски извори велат дека договорот е „неизбежен“, освен во случај на „изненадување во последен момент“.
Сепак, започнувањето на конечната одлука беше одложено за рано утрово откако британскиот премиер Борис Џонсон и претседателката на Европската комисија Урсула фон дер Лајен разговараа телефонски „за последните детали од договорот“.
За потсетување, Велика Британија излезе од Европската Унија во јануари и имаше рок до 31 декември да постигне трговски договор со Брисел. Сепак, преговорите не се поместуваа од „мртва точка“ скоро една година поради три клучни прашања за кои ниту една страна не сакаше да попушти - риболов, еднакви права и управување.
