Во текот на чистењето и реставрацијата на собите од музејот во Ватикан, екипата која работеше на тој проект дојде до големо откритие кое им било под носот цели 500 години.
Две слики на ренесансниот сликар Рафаел беа пронајдени во собите на музејот во Ватикан, а експертите сметаат дека тоа се последните негови дела пред смртта во 1520 година.
„Ова е фантастично чувство. Знаејќи дека ова се веројатно неговите последни две дела, скоро да може да се почувствува присуството на маестрото“, рече главниот реставратор и лидер на проектот, Фабио Пјачентини.
Во 1508 година, Папата Јулиј II му дал задача на Рафаел да ги наслика неговите приватни апартмани. Артистот успеал да комплетира три од собите, кои денеска се познати како „Собите на Рафаел“. Тогаш ја почнал четвртата соба, која била најголема и тој сакал да ја нацрта во различна техника од останатите три.
Но, неговата предвремена смрт го оневозможила да ја заврши работата и дел од неговите студенти ја завршиле последната соба. Овие две пронајдени слики се верува дека се дел токму од таа четврта соба. Нивното пронаоѓање реши 500-годишна мистерија, бидејќи луѓето од музејот во Ватикан знаеја дека постојат барем уште неколку дела на големиот мајстор, но не ја знаеја нивната локација.
Двете женски фигури, од кои едната треба да ја претставува Правдата а другата Пријателството, биле насликани од Рафаел околу 1519 година.