Европскиот пазар на автомобили забележа мал раст во септември, поттикнат од продажбата на возила во Италија и Германија.
Бројот на регистрирани нови возила се зголемил за 3,1 отсто на годишно ниво во септември на 933.987 единици, соопшти Здружението на европски производители на автомобили (ACEA).
По падот од 55,1 процент во март, па 76,3 проценти во април како резултат на изолацијата на граѓаните и затворањето на автосалоните, европскиот пазар на автомобили полека закрепнува од последиците од пандемијата со COVID-19.
Септември е првиот месец со раст од почетокот на кризата, кога пазарот ги гледа придобивките од владините стимулации усвоени во повеќето големи европски земји.
Закрепнувањето варира од една земја до друга - во Италија растот е 9,5 проценти, во Германија 8,4 проценти, додека Франција и Шпанија продолжуваат да бележат пад од 3, односно 13,5 проценти. Петтиот и шестиот по големина пазар на ЕУ, Полска и Белгија, исто така, забележаа раст од 8, односно 1 процент.
Во првите девет месеци од годинава, само 7,06 милиони нови возила излегле на улиците во земјите на ЕУ, односно скоро 2,7 милиони помалку возила отколку во истиот период во 2019 година, или минус 28,8 проценти. ACEA предвидува историски пад на испораките на возила од 25 проценти за цела 2020 година.
Групацијата VW Group уште е автопроизводител со најдора продажба на Стариот континент. На второ место е групацијата PSA Group, а на трето Renault Group. Четвртото и петтото место ги заземаат Hyundai-Kia, односно групацијата BMW Group.