Откако беа издадени забрани за Huawei од страна на американската влада, голем дел од пазарот се пренасочи кон искористување на оваа ситуација и тоа резултираше во преземање на работите на кинеската компанија. На пример, во последните три месеци Nokia потпиша 15 нови договори за испорачување на 5G опрема, а Huawei само 10, што претставува голем пресврт на пазарот.
Американската кампања против Huawei ја „урна браната“ за кинеската компанија, а од тоа профитираше Nokia, која би можела да ја искористи оваа шанса за да се врати на врвот на телекомуникационата индустрија.
Томи Уито, претседателот за мобилни мрежи во Nokia, за CNN Business изјави дека забраната од американската администрација кон Huawei ќе делува позитивно кон шансите на Nokia за сериозно наметнување како лидер во производството на телекомуникациска опрема.
Отворени можности
Уито истакна дека политичката ситуација која се создаде околу Huawei отвора можност за зголемување на пазарниот удел на Nokia. Досега на светскиот пазар Nokia потпиша 43 договори за испорачка на 5G опрема, додека кинескиот конкурент остана на 50 договори. Аналитичарите велат дека до крајот на март Nokia имала потпишано околу 30 договори, а Huawei 40, што сугерира на тоа дека финската компанија во последните три месеци освоила повеќе нови купувачи.
Блокада за кинескиот гигант
„Неколку држави го блокираа кинескиот конкурент и тоа отвори шанса за нас и нашата компанија“, изјави Уито.
Тој го истакна примерот со јапонскиот телекомуникациски оператор SoftBank, кој минатиот месец ги избра Nokia и шведскиот производител Ericsson како снабдувачи за 5G опрема. Претходно, Huawei го снабди SoftBank со 4G опрема, но поради скандалот со шпиунирање кој го отвори американската влада против него, SoftBank се реши да не потпише нов договор со Huawei.
Nokia е во преговори и со неколку компании кои снабдуваат мрежа на мали и рурални подрачја во САД, како би го замениле присуството на Huawei како главен снабдувач со 5G опрема. Покрај тоа, финската компанија им пристапи на уште неколку оператори со понуда да им послужат како „план Б“, во случај на дополнителни американски санкции над Huawei.