Конор Мекгрегор се кандидира за претседател на Ирска

Познатиот ММА борач Конор Меккрегор одлучи да влезе во политиката, и јасно објави дека неговите амбиции се да стане претседател на Република Ирска.

Мекгрегор (36) пред четири дена го посети американскиот претседател Доналд Трамп, а очигледно неговиот разговор со првиот човек на најмоќната земја во светот го инспирирал и самиот да се вклучи во политиката на неговата земја.

Мекгрегор, кој се декларира како ултрадесничар, на социјалните мрежи објави дека планира да се кандидира за претседател само со една цел – сака целосно да им забрани на мигрантите да доаѓаат во Ирска.

Како што истакна, сака да ја „спаси Ирска“ од спроведување на документ со Европската унија кој се однесува на имигрантите.

Имено, Ирска мора целосно да го имплементира Пактот за мигранти на ЕУ до 12 јуни 2026 година, според кој секоја земја од Европската Унија подеднакво би им давала азил на имигрантите кои доаѓаат во Европа.

Следните претседателски избори во Ирска мора да се одржат најдоцна до 11 ноември оваа година, а Мекгрегор рече дека веднаш ќе распише референдум на кој граѓаните ќе се изјаснат дали се за прифаќање имигранти или не.

Потписот на претседателот на Ирска е последен во низата кога ќе треба да се имплементира одлуката за миграцискиот пакт на ЕУ, а Мекгрегор рече дека нема да го потпише како претседател доколку тоа не го сакаат граѓаните.

На Мекгрегор му претстои долг пат за да стане претседател на Ирска. За официјално да стане кандидат, тој ќе треба да биде номиниран од најмалку 20 од 234 членови на долниот и горниот дом на Парламентот, но тој е уверен дека тоа ќе се случи.