Италијанскиот стратег го водеше Челси, а го тренираше и Лукаку во Интер. Смета дека Белгиецот допрва треба да се покаже во уште подобро светло во синиот дрес, но проблемот е кај тактиката на Тухел.
Ромелу Лукаку одлично ја почна сезоната во Челси откако се пресели од редовите на Интер за 115 милиони евра, постигна голови против Зенит, Арсенал и Астон Вила, но сега веќе 4 натпревари по ред е влезен во пост.
Антонио Конте, кој со Лукаку во нападот го освои Скудетото минатата сезона со Интер, смета дека Томас Тухел сѐ уште не нашол начин како најдобро да го искористи белгискиот голгетер. Синоќа Лукаку исто така не го најде патот до мрежата во дуелот со Јуве кој неговиот тим го загуби со 1:0.
„Тој може уште подобро, поради неговата техника. Веќе игра на многу високо ниво, но секој играч мора да продолжи да се подобрува сѐ до денот кога ќе се пензионира“, вели Конте во изјава за Sky Sport Italia.
„За време на еден натпревар има моменти Лукаку треба едноставно да се вклучи, но без оглед на тоа што е еден од физички најсилните напаѓачи за играње против, тој може да направи штета на било кој дел од теренот. Кога имаш таков центарфор треба да го искористиш, а јас мислам дека Челси сѐ уште не сфатија како најдобро да го искористат“, додава.
„Минатата сезона немаа вистински центарфор, па ротираа позиции, додека Ромелу е вистинска референтна точка во нападот. Доколку успеат да сфатат како да го искористат Лукаку, тогаш Челси може да стане претендент за Лигата на шампионите сезонава“.
Италијанецот беше на клупата на Челси две сезони, а во 2016/17 ја освои Премиер лигата, додека наредната беше победник во ФА купот. Со Интер лани го освои Скудетото, а двете сезони колку што беше во Интер ги мина заедно со Лукаку, кој токму на негово барање и дојде во Милано. На крајот индиректно се пофали и сам себе.
„Добар тренер е оној кој успева да ги подобри своите играчи. Мислам дека со Ромелу завршивме одлична работа за тие две години“, заврши Конте.