Италијанскиот премиер Џузепе Конте изјави дека е загрижен поради можното враќање на епидемијата на COVID-19, бидејќи граѓаните сè повеќе се собираат по кафулиња.
„Не е момент за прослава“, ги предупреди Конте и додаде дека во сегашната ситуација е неопходно да се почитуваат мерките за физичка дистанца и носењето заштитни маски.
Во Италија по епидемијата, во која починаа над 32.000 луѓе, од 4 мај почна ублажувањето на мерките за карантин. Италијанците почнаа да излегуваат по два месеци изолација и ограничување на слободата на движење, но многумина се желни да се вратат на социјалниот живот.
Продавниците, кафулињата и рестораните од понеделник беа повторно отворени, а оттогаш многу луѓе го прославија излегувањето од карантин по отворените тераси на кафулињата.
Медиумите објавија фотографии од млади луѓе како без маски седат групирани и наздравуваат во кафулињата.
Претседателот на италијанската регија Венето, Лука Заја, предупреди дека повторно ќе ги затвори рестораните, кафулињата и плажите ако се зголеми бројот на заразени поради непочитување на мерките.