Интер на Антонио Конте по вторпат сезонава остана со празни раце во пресметка со Јувентус и се чини се збогува од шансите за Скудетото.
Стратегот на Интер ги воочува разликите помеѓу неговиот и тимот на Јувентус кој со години доминира во Калчото.
„Мислам дека до првиот гол натпреварот беше рамноправен. Почнавме подобро во вториот дел и имавме контрола на натпреварот. Тогаш Ремси даде гол и тоа за нас беше психолошка пресвртница. Тие се подобруваа, а не се мачевме и неуспевавме да се опоравиме. Тоа е мојата анализа“, вели Конте.
Немаше голови на дербито во Торино с до 55. минута кога Велшанецот Арон Ремзи постигна гол за водство на Јувентус. Потоа Пауло Дибала го дуплираше водството за победа на Јуве и тоа втора сезонава на Интер откако со 2:1 славеше и на „Меаца“.
„Освен бодовната разлика на табелата, во однос на Јуве имаме и 6 бода разлика во меѓусебните дуели поради двата пораза против нив. Такви се фактите. Бевме добри во обидот да останеме во трка со нив, но неизбежно е да се направи споредба. Мора да се биде позитивен и да се донесат правилни одлуки. Дури и во поразите може да се прават споредби кои ќе ни помогнат да се подобриме во секој аспект, во искуството, карактерот и квалитетот“, смета црно-синиот стратег.
Неизбежен беше и коментар во однос на епидемијата на корона вирусот кој во Италија и натаму не е под контрола, а како последица на тоа натпреварите се играат пред празни стадиони. Дури има и најави за целосен прекин на првенството.
„Сите ние сме човечки суштества, имаме фамилии и грижи. Не е лесно да се преправаме дека ништо не се случува. Ни станува тешко да се справуваме со одредени ситуации бидејќи за да останеме сконцентрирани понекогаш треба и да се повиши гласот, но ситуацијата е деликатна. Се надевам дека која и да биде одлуката, ќе биде за да се заштитат сите“, заврши Конте.