Денеска се игра дербито на Милано кое всушност е и битка за титулата бидејќи Интер и Милан се бркаат за првото место.
Од 15 часот на „Џузепе Меаца“ стадионот Милан условно како домаќин ќе го пречека лутиот градски ривал Интер во популарното Дерби дела Мадонина. Одамна како ова дерби немало огромно значење како сега бидејќи на табелата во Серија А води Интер со 50 бодови пред Милан кој има бод помалку, односно 49.
„Ова ќе биде поинакво дерби од оние кои ги игравме изминативе години затоа што двата тима се борат за врвот на табелата. Убаво е за градот Милано да има вакви натпревари во кои облогот е голем. Мораме да победиме затоа што е дерби и заради моменталната ситуација на во лигата“, вели стратегот на „Нераѕурите“, Антонио Конте.
Интер минатото коло го презема врвот токму од Милан и како лидер влегува до миланското дерби.
„Тоа ни даде чувство на смиреност. Секогаш мора да работиме со вистинскиот ентузијазам, сила и одлучност. Кога табелата изгледа вака, мора да се биде уште по возбуден и да се има поголем ентузијазам и желба за подобрување“, додава тој.
За Конте голем предизвик ќе биде како неговите избраници да го запрат Златан Ибрахимовиќ на кој Интер му е омилена мета за постигнување голови.
„Ќе се справиме со него со тоа што ќе делуваме како тим и ќе се обидеме да ги сведеме грешките на минимум. Тој е играч кому му оди одлично во Милан. Постигнуваше голови на претходните дербија, но тоа не значи дека ќе постигне и сега. Најважното за нас е да дадеме сѐ од себе и да победиме“.
Натпреварот ќе го суди Даниеле Довери.