Тренерот на Челзи, Антонио Конте, по поразот од Манчестер Сити им се обрати на критичарите без влакна на јазикот. Тој ги нападна Гери Невил и Џејми Реднап, кои ја критикуваа играта на Челзи во последниот натпревар.
Реднап рече дека Челзи играат „анти-фудбал“ и дека тоа е „криминал против фудбалот“, додека Гери Невил рече дека играчите на Конте биле „очајни и катастрофални на теренот“.
Антонио Конте е познат по отворениот пристап со медиумите и скоро никогаш нема влакна на јазикот кога се работи за обраќање на оние кои го критикуваат, без разлика на тоа која е личноста која го критикува. Овојпат се работеше за ТВ аналитичарите, поранешните фудбалери Гери Невил и Џејми Реднап, кои рекоа дека играта на Челзи против Манчестер Сити била срамна и очајна, а Гери Невил изјави дека Челзи играле „како кукли, само го гледаат противникот додека си ја подава топката“.
„Во овој момент морам да ги прифатам критиките, но не сум толку глупав да играм отворено против (Манчестер) Сити и да изгубам 3:0 или 4:0. Мислам дека аналитичарите треба да почнат да размислуваат со главата и сметам дека треба да имаш тактичко знаење пред да отвориш уста да зборуваш било што. Тие само зборуваат глупости“, рече Конте по натпреварот.
Овој пораз беше четврти во петте последни лигашки натпревари за Челзи, а играчите изгледаат како незаинтересирани за лигата. Актуелните шампиони победија само двапати во втората половина од сезоната и сега заостануваат 25 бода зад Манчестер Сити и се во опасност да не обезбедат пласман во ЛШ наредната сезона.