Интер денеска гостува кај бугарскиот шампион почнувајќи нова авантура откако испадна од Лигата на шампионите.
„Ќе се соочиме со екипа која е навикната да игра во европските натпреварувања и која е лидер во своето првенство со добра разлика пред останатите. Лудогорец е добар тим, со неколку квалитети. Одлични се во офанзивата. Ние мора да бидеме упорни, смирени и желни: ќе ни треба најдоброто од нас бидејќи играме против тим кој е во форма, мора да бидеме внимателни и во натпреварот да влеземе со почит“, вели тренерот Антонио Конте.
Натпреварот од Лига Европа за Интер доаѓа по поразот од Лацио во Серија А со кој „Нераѕурите“ паднаа на третото место.
„Натпревар кој ни тежи поради резултатот. Нашата игра беше одлична. Но, тргнуваме од почеток, со желба да се подобриме и да одиме понатаму. Токму поради тоа Лига Европа ни доаѓа во прав момент“, оптимист е Конте.
Во Разград вечерва нема да играат Марцело Брозовиќ и Милан Шкринијар. Затоа пак најверојатно шанса ќе добие поранешниот капитен Андреа Ранокија кој заедно со Конте беше на официјалниот прес. За очекување е Интер да настапи со комбиниран тим, односно шанса да добијат оние со помала минутажа.
„Марцело остана во Милано бидејќи има проблеми со глуждот и следи посебна програма за да се опорави сто посто. Шкринијар нема да игра бидејќи одлучив да остане дома. Што се однесува за Алексис Санчес, се опорави од лоша повреда и допрва треба да се врати во добра физичка форма. Подготвен е да игра, ќе ни помогне да ги оствариме нашите цели“
На голот и вечерва ќе биде Даниеле Падели бидејќи Самир Хандановиќ и натаму не е целосно оправен.
„Секој играч мора да мисли како самиот да се подобри, а не да мисли на тоа кој игра до него. Индивидуалниот напредок потоа самиот се префрла на оној на колективот“, вели Конте.
Натпреварот почнува во 18.55 часот на „Лудогорец Арена“ во Разград, а ќе го суди шпанскиот арбитар Карлос дел Серо Гранде.