Антонио Конте имаше кошмарно деби на клупата на Наполи во Серија А. На „Маркантонио Бентегоди“ во Верона, домаќинот го декласира тимот на Конте со 3:0 во првото коло. Лут и разочаран, тренерот ја презеде вината за поразот, а на играчите им порача дека „треба да се срамат“.

„Оние што ме познаваат, знаат дека срцето ми крвари денеска, а се надевам дека и на одредени играчи исто така, бидејќи тоа барем би значело дека сме на вистинскиот пат“, изјави Конте пред новинарите.
Како што рече, неговиот тим се „стопи како снег на сонце“ по првиот примен гол.
„Треба да им се извиниме на луѓето во Неапол, кои страстно нѐ следат. Јас сум тренер и правилно е што во целост ја преземам одговорноста. Нашиот настап во второто полувреме беше неприфатлив“, изјави Конте.
Конте го презеде Наполи во јуни, и е четврти тренер за само една година од заминувањето на Лучано Спалети, кој на клубот му го донесе Скудетото во 2023 година по 33 години. Интересно, пред две години, во првото коло од шампионската сезона, Наполи победи со 5:2 во Верона.
Конте ја освои Серија А како играч, пет пати со Јувентус, но и како тренер, три пати исто така со тимот од Торино и еднаш со Интер.